Actualidade

O Concello de Guitiriz convoca o IV Premio Díaz Castro de poesía

O Concello de Guitiriz convoca o IV Premio Xosé María Díaz Castro de poesía para honrar a memoria do seu ilustre poeta e contribuír á promoción da poesía galega. Ao certame poderán concorrer as poetas e os poetas que o desexen, cos seus poemas escritos en lingua galega, segundo a normativa vixente da Real Academia Galega. Os poemarios aspirantes ao premio serán de tema e forma libres, cunha extensión mínima de 500 versos. Deberán ser orixinais e estar inéditos na súa totalidade, condición que se estende ao soporte dixital.

 

Poesía para reflexionar

Velaí vén a celebración do Día Mundial da Poesía (21 marzo) que chega co anuncio da boa nova de ver ao noso Xurxo Alonso premiado en Guitiriz co solemne certame de poesía “Xosé María Díaz Castro”. Deste xeito, a lembranza do fenecido autor de “Nimbos” retorna á Vilagarcía que recorda o seu fundamental paso polas aulas do histórico Colexio León XIII na década dos anos corenta.

Xurxo Alonso gaña o Díaz Castro de Poesía con 'Oracións profanas'

O escritor Xurxo Alonso, nado en Bos Aires e afincado en Vilagarcía de Arousa, vén de gañar o III Premio Xosé María Díaz Castro de Poesía co poemario presentado baixo o título 'Oracións profanas'.

 

"É unha alegría moi grande, o premio dá forzas para seguir, porque lle dedico moitas horas a isto e vexo que paga a pena", precisa o autor, que retomou a súa paixón pola escrita hai tres anos, logo de botar sete parado, tal e como el mesmo explica.